Les mots surlignés font l'objet d'une note
1Reçue à Grenoble, le 25 janvier 1573.
2Monseigneur, estant ce jour dhuy party de Lyon pour macheminer là part où sera
3monsieur le mareschal de Dampville, et luy rendre les quatre canons quil a pleu au roy
4ordonner luy estre mennez avecq le plus de pouldres et bouletz quil seroit possible, et parce
5que ladite munition de bouletz est fort rare tant en votre gouvernement que celluy de Lyonnois,
6esquelz il ne sest trouvé que IIIC LXXII bouletz, tant en la citadelle et arcenal du roy
7à Lyon, que en ce lieu de Vienne où je suis presentement arrivé ; et voulant prendre ce quil
8y an ya au chasteau de Pippet, avecq quelzques eyssieulz, une paire de vereins, et de la
9corde à mesche, les consulz dudit lieu ne mont vouleu aulcune chose bailler sans
10votre comandement, quelzques remonstrances que je leur aye peu faire, exhibé mon
11pouvoir et lattache quil vous pleut me bailler sur icelluy en votre maison de Laval,
12ensemble les coppies collationnées aux originaulx de la lettre du roy pour envoier lesdits
13canons, de celle aussy de mondit sieur le mareschal de Dampville envoyées à monsieur
14de Mandelot lieutenant pour sa majesté à Lyon, et le mandement quil a pleu à mondit sieur
15le mareschal menvoier pour ceste effect. Ce que jay trouvé estrange veu quilz sont
16fort asseurez que cest pour le service du roy, et quil ny a aulcunes piècces
17en ce lieu, ny en votredit gouvernement à quoy lesdits bouletz puissent servir sinon que
18les troys canons qui sont au Crest, lesquelz sont tous esventez et de nul service ;
19et aussy quil me conviendroit demeurer en ce lieu avec deux compaignies de gens de
20pied qui accompaignent ladite artillerie, ensemble les mariniers, chose qui seroit cause
21de grandz frais à sadite majesté ; pour obvier ausquelz, je nay laissé de m’acheminer sans
22prendre aulcune chose audit Vienne, après que lesdits consuls m’ont faict entendre
23quayant receu votre mandement, ilz envoyeront incontinant toutes lesdites munitions
24à leurs despens là part où sera mondit sieur le mareschal, lequel faict estat
25que je luy rende tout ledit nombre de bouletz et autres munitions suyvant lestat
26que je luy en ay cy devant envoyé, vous suppliant, monseigneur, leur comander
27de ce faire affin que le service du roy ne soit en cela retardé et qu’il ne faille
28y renvoyer pour si peu de chose qui pourra peult estre cause d’ung grand bien
29et aussy que ce seroient fraiz inutilz. Et affin que vous cognoissiez ce
30qui est contenu par toutes lesdites lettres je vous en envoie les coppies, et aussy
31mondit sieur de Mandelot leur en a rescript par moy que nen seriez que comptable.
32Et ne scaichant chose digne de vous, je vous prieray me comander voz bons
33plaisirs lesquelz j’accompliray très volontiers, comme vous estant serviteur très humble.
34Monseigneur, je prieray le Createur vous donner en parfaicte santé, très longue et
35très heureuse vie. De Vienne, ce XXIIIIe janvier 1573.
36Votre très humble et très obeissant et plus
37affectionné serviteur à vous obéyr
38La Magdeleine